تاج ... و امرى الى الله

انا مش بحب التاج اصلا عشان بيكون فيه تلميحات سياسية و انا بحب احترم نفسى جدا...و مش بحب العساكر يلعبوا على قفاية صلح ...بس المرة دى التاج جاى من اعز الناس عليا فى البلوجر كله ... من كامى ... و انا طبعا مقدرش اردلها طلب

لو مكنتش مصرى بس عربى كانت هتبقى نظرتك للمصريين و اللى بيحصل فى مصر دلوقتى ؟

مش عرفة بيتهيألى على حسب انا حبأة منين ... يعنى كنت ممكن اقول عليهم ... احسن البيحصل فيهم عشان شعب خاين باع القضية ... او كنت ممكن افرح فى الاهلى انه طلع من البطولة على يد النجم الساحلى ... او اقول انهم جايين يشحتوا فى بلدنا و يشتغلوا فيها و يخدوا خيرها ... و ده طبعا لانى ساعتها حأكون "ما شربتش من نيلها و لا جربت اغنيلها و لا لما احزن امشى فى شوارعها اكلم نفسى قصدى اغنيلها "...من الاخر احنا العرب عموما كنا ديما ارض خصبة للغرب انهم يزرعوا فينا فكره المسمم البيدعو للتفكك

لو كنت اوربى او غير مسلم هتبقى ايه نظرتك للعرب و المسلميين ؟

لو كنت انسان مثقف كنت اكيد حأفهم ان مافيش فئة فى الدنيا كلها وحشة او كلها حلوة ... بس لو جاهل و متعصب اكيد كنت حأنساق بل حأظيت كمان بالكلام البيقوله الاعلام الغربى

لو قالوا لك انك بقيت رئيس جمهوريه هتعمل ايه ؟

حأعمل زى العملته فى قصيدة "الملوخية"بتاعتى... عملت قمة وجمعت الامة و...لمات اللمة وخرجنا فى جيوش حربية

لو سمح ليك برؤيه الرسول صلى و انك تقول كلمة واحدة ؟

الشفاعة ... سامحنى كان نفسى اكون مسلمة اقوى

لو كنا فى عصر ازدهار الاندلس كنت تتخيل نفسك ازاى ؟

كنت اتعلمت الفروسية و المبارزة ... و مش بعيد اتجوز واحد من ملوك الطوائف و نحكم بعدل و حكمة و نحاول نحول دون الفرقة بين ملوك العرب ... لغاية ما يسمونا فى الاخر

لو خطبت او اتخطبتى لواحد و اثناء الخطبة اكتشفت او اكتشفتى ان الطرف الاخر غير قادر على الانجاب هيكون ايه تصرفك؟

طالما مخطوبين يبأة اكيد بحبه و مقتنعة بيه ... و اكيد طبعا مش حتأخلى عنه عشان كان ممكن اكون انا المكانه و اكيد مكنتش حنبسط لو اتخلى هو عنى و لو انى مكنتش حألومه قوى لو عمل كده

لو طلعت القمر تكتب ايه ؟

حأكتب ... هنا كانت فتاة مصرية مسلمة عادية لم تتخيل يوما ان يأخذها طموحها الى القمر ...بل الى ما هو ابعد من ذلك

لو مررت التاج لحد ومجاوبش هتعمل ايه ؟

و لا حاجة ... حأحترم طبعا حريته بس افضل انه يقولى مجوبش ليه فى كلمتان عشان منظرى قدام الامم المتحدة

تمرر التاج لمين ؟

اوراق و قلم رصاص

السيد شبل ... بلا اسم

luv to seek the truth

horizon

the nile pharoah